Hira noforonin’i Arthur ao amin’ny tarika Les Frères Arthur. Nampihirainy an’I Dety sy Norine. Ireto mpihira ireto dia mpirahavavy ary I Moreno no nampihira azy voalohany tao amin’ny tarika Moreno. Ny niakaran’izy mirahavavy ireto an-tsehatra voalohany dia nandritra ny fankalazana ny fahafolo taona nihiran-dRandrianasolo Benjamin, tao amin’ny Tranompokonolona Isotry ny volana novambra 1972. Vita kapila 45 tours – Discomad, ity hira ity; Taty aoriana dia nohavaozin’I Arthur ny hira ary ankehitriny dia ny zanany no mihira azy.Hira anisan’ny tsy afaka ambavan’ireo mpifankatia ity hira ity tamin’ny taona fitopolo tany ho any ary saiky nandefa azy avokoa ny radio rehetra tamin'izany fotoana. Amin’izao fotoana izao dia ny Feon’Imerina no iray amin’ireo vitsy mbola mamoha itony karazan-kira itony any am-pon’ny maro.