Anisan’ny ventiventesina ao anatin’ny
soatoavina demokratika ny « fandraisana anjaran’ny olom-pirenena ». Mbola tsy
tokony ho vaovao ho amintsika Malagasy koa io foto-kevitra io. Ny Firenena
rehetra, na tamin’ny vanim-potoana inona na tamin’ny vanim-potoana inona, ary
na inona rafi-panjakana nijoroany dia nampandray anjara foana ny olom-pirenena.
Tsy mahagaga loatra araka izany raha hita koa ao amin’ny foto-kevitry ny fahendrena
malagasy ny fandraisana anjara ny olom-pirenena.
Misy àry ny antsoina hoe « adihevitra
mampiorina, izay manamafy ny fahalalana sy ny fahaizana mamakafaka manoloana ny
olana misy », amporisihan’ny fiaraha-monina demokratika ifantohan’ny
olom-pirenena. Tena tsara ifantohana mihitsy io voalaza etsy ambony io, raha
izao lalan-tsarotra diavin’ny Firenena malagasy izao. Hoy indrindra ny
ohabolana :
Mieritreritra atao indray miserana ka nony
manenina mandavan-taona.
Ilay fomba fieritreretana indray miserana
iny tokoa dia ilazana ny fanahin’olona tsy mifantoka loatra amin’ny zavatra atao
na amin’ny zava-mitranga. Matetika anefa iny hakamoana handalina ny zava-misy
iny no mety hitondra fatiantoka lehibe ho an’ny isam-batan’olona na mety ho
an’ny besinimaro mihitsy aza. Tokony hanadihady mandrakariva ny zava-miseho ny
olom-pirenena, indrindra ireo zava-misy mahakasika ny fiainam-pirenena Manamafy
izany ity ohabolana manaraka ity :
Mieritreritra lalina fa raha lava ny tanety
misy fisainana
Ny fandraisana anjara amin’ny adihevitra
politika ohatra dia afaka andrefesana ny fahalalahan’ny olom-pirenena. Matoa
tsy sahy na kamo hiady hevitra momba ny raharaha politika ny olona dia tsy
mifantoka ao an-tsainy akory fa endriky ny « demokrasia » izay fandraisany
anjara izay. Azo heverina ho tsy mahatanty demokrasia ny olona tsy mandray
anjara amin’ny adihevitra politika satria tsy afaka hanaja ny hevitry ny hafa.
Sokajian’ny fahendrena malagasy ho « manao toton’ondry bory » kosa ny olona
tahaka izany, na dia tsy miloa-bava aza satria tsy mahalala afa-tsy hevitra
tokana. Matetika tokoa manko dia manome tsiny lava no mba fandraisana
anjaran’ny olona toy izany. Araka ny ambaran’ity ohabolana manao hoe ity:
Raha izy no mahandro patsa, tsy manino-tsy
maninona, fa raha izahay no mitono toho, dia ovany ho mandany laoka