Anisan'ny nahazo toerana lehibe tamin'ny fitakiana nataon'ny mpianatra tamin'ny taona 1972  ny fanagasiana ny fampianarana, tsy tongatonga ho azy izany fitakiana fa vokatry ny zava-nisy eran-tany. Mbola miteraka ady hevitra lehibe izany ankehitriny : Inona no nahatonga ny fanagasiana ? Ahoana ny fomba nampiharana azy? Naninona no tsy nahomby? Ny fampiasana ny teny vahiny ve no tena mitondra any amin’ny fahombiazana?  

NY NAHATONGA NY FANAGASIANA

Ry zareo tany Frantsa tamin'ny faramparan'ny taona fitopolo dia tao anatin'ny fotoana nikarohana voambolana amin'ny teny frantsay, hanatsarana ny fanabeazana tany aminy. Nahatsapa izany ireo manampahaizana malagasy sasany, ka nanapa-kevitra ny hoe nahoana isika no hiandry izay voambolana karohin'ny vazaha, tsy aleo koa ve mba mikaroka amin'ny tenindrazantsika. Ny UNESCO ihany koa dia nanamafy fa ny tenim-pirenen'ny tany iray no teny fampitana fahalalana mahomby indrindra, ary ireo manampahaizana malaza eran-tany dia nampianarina tamin'ny tenin-drazany.

NY FOMBA NAMPIHARANA NY FANAGASIANA

Rehefa tena raikitra fa hirosoana ilay fanagasiana dia nizarazara maromaro ireo hevitra nivoaka. Misy ireo antokon'olona mpamendrofendra, sahy nilaza fa ny fanagasiana dia fanandratana ny fiteny Merina.

Ny hafa indray nilaza tamin'izany, fa ho very ny ankizy satria tsy hahay tenim-pirenena vahiny intsony. Misy indray koa ireo nanantena sy nino fa tsotra ny fanatanterahina ny fanagasiana;

TSY NAHOMBY NY FANAGASIANA

Nirosoana tokoa ilay fanagasiana, nampiasa ny ron-dohany ireo mpampianatra mpikaroka voambolana tamin'ny isan-taranja. Indrisy anefa fa dia tsy fahombiazana ny vokany.

Ny antony nihazakazahana ny fametrahana azy, tsy lavorary ny nenti-manana nanaovana azy, ireo mpampianatra koa tsy dia mbola ampy traik'efa loatra. Ny fomba fandraisana mpampianatra nataon'ny mpitondra ihany koa no fositra nanimba ilay fanagasiana, satria ireo mpianatra afaka BEPC dia miofana volana vitsivitsy dia lasa mpampianatra eny amin'ny Sekoly fanabeazana fototra ary izay afaka BACC dia alefa mampianatra eny amin'ny sekoly Ambaratonga faharoa fototra amin'ny alalan'ny fanompoam-pirenena ivelan'ny tafika.

NY SEKOLY MAMPIASA TENY FRANTSAY

Nony tsapa fa nisy lesoka ilay fanagasiana dia nihazakazahana, indray ny sekoly mampianatra amin'ny teny frantsay.

Ny vokany dia tsy ambony tsy ambany ny fahaizan'ny mpianatra, sady tsy mahafehy teny vahiny no tsy mahay teny Malagasy.

Teny malagasy no ampiasainy sy iresahany amin'ny ray aman-dreny, kanefa teny frantsay no asesika ao an-dohany any am-pianarana. Tsikaritra fa na mahay miteny frantsay aza ilay mpianatra dia mpanao tsianjery maimbo fotsiny.  

AZO ANTOKA NY TENY MALAGASY

Ny mpikaroka maro eran-tany dia nilaza fa ny olona tsara fototra amin'ny fahaizana ny tenin-drazany dia tsy manana fahasahiranana amin'ny fifehezana ny tenim-pirenena hafa.  Azo ampitana tsara ny fahalalana rehetra ny tenin-drazantsika, ny porofo tsy azo lavina, matoa mifikitra amin'ny fivavahana kristiana ny ankamaroan'ny malagasy, dia noho ilay baiboly izay novakiany tamin'ny teny malagasy, tsy azo lavina ihany koa fa maro ireo mpianatra nampianarina tamin'ny teny malagasy no tafita.

Raha tiana handroso ny firenena tsy azo atao ambanin-javatra ny fampianarana. Ilaina ny mandinika amin'ny saina tony izay fomba hampahombiazana ny fampitana fahalalana amin'ny teny malagasy. Raha tena manana ny atao hoe ambompom-pirenena isika malagasy dia atao vaindohan-draharaha izay ary tsy tokony hitsitsiana vola aman-karena ny fanaovana izany.