Mahavariana ihany ny fitondrantenan’ny Malagasy sy ny fitsipika hitondrany azy amin’izao vanim-potoana iainantsika izao… 

Indraindray toa diso fiheverana ihany ny manampahaizana Malagasy rehefa milaza ho mitondra vahaolana ho an’ny mpiray tanindrazana aminy. Misy amin’izy ireny no nandalim-pahaizana fa ao koa ny mahay manaka-kevitra ary mampifandray izay hevitra hitany tany anaty boky mitahiry fahalalana tany, amin’izay inoany fa fototry ny tsy fandrosoana na ny fisalasalana iainan’ny vahoaka. Tsy mety voarain’ny sarababem-bahoaka anefa ireny hevitra voizina ireny satria toy ny voalazan’ity ohabolana ity ny akony:

  Mitondra hodi-nato miantsinanana 

Io ohatra io dia nilazana ny olona tsy mitondra zava-baovao akory satria dia ny efa nisy ihany no entina aseho ny olona. Ny “nato” dia karazan-kazo nakan’ny Ntaolo loko, fahiny, ary any antsinanana no misy io karazan-kazo io. Mahatsikaiky sy toa sampona ihany raha toa hakany antsinanana ny olona iray ka hitondra io “nato” io nefa any no tena misy azy. Moa va tsy izany no ataon’ny ankamaroan’ny Malagasy amin’izao fotoana izao. Nalaza ho loharanom-pahendrena isika Malagasy. Tsy nampiasaintsika firy ireo hevitra mahasoa nofonosin’ny “fanahy no olona” fa aleontsika manandrana ny an’ny hafa izay hafa ny fototra ijoroany koa mainka moa fa ny fampiharana azy.

Noho izany, matetika ny manam-pahaizana Malagasy no toy ity voalazan’ny ohabolana manao hoe ity: 

Androngo milanja lolo : be am-pitondrana fa kely am-pihinanana 

Ity oha   bolana faharoa ity dia nanondroana  ny toetr’olona izay toa tsy arakaraky ny fisehoana ivelany, mivelabelatra toa lolo, ny lanjambidin’ny ezaka nataony na ny zava-bitany. Azo ampifandraisana koa amin’ilay finiavantsika te hampandroso ny fiainantsika io ohatra io. Mivelabelatra aok’izany ny hevitra tiana entina hampandrosoana ny firenena kanefa .zara rah any iray ampahafolony no azo ampiharina sy azo tanterahina! 

Ny fahitana izay fahadisoam-piheverna izay no manosika ny olona sasany hilaza fa :

 Akoho tsy naneno hoatr’izay lanin’ny kary

 Rehefa ela niandrasana toe-javatra tsy mety hitranga na zavatra tsy mety ho tonga na olona mihitsy aza ireo nampanatenaina dia loa-bolana mampiasa io oham-pitenenana io.

Eo no hanairana ny ambopontsika mianakavy. Dia ho sanatria ve ho alaim-panahy haka ny toeran’ny fotsifotsy fanahy ka hinia tsy hijery afa-tsy ny tombotsoa kelin’ny tena? Koa meteza ho olom-pirenena vanona Itodiho ny fahendren-drazana. Ny ombalahibemaso koa mba manana ny fitsipi-pitondrantena navelany ho lovaintsikan fa isika no toa miavo-tsy feno! 

Tondraka anio manan-jara, izay ampitso ka ho hitanao: 

 Fitenin' ireo manaram-po indray andro amin' ny be ananany fa tsy miraharaha na mitsinjo izay ho avy Misolo voina ny akalana ka mikapa hena ambony fe: Enti-milaza ny olona manao mosalahy izay tsy manahy kely akory ny zavatra mety hahavoa azy.

Bibilava vonona: tsy tongotra hitsipaka, tsy tanana handrangotra, fa Andriamanitra no andrasana 

: Entimilaza ny fisian' ny tody, na koa ny fomban' Andriamanitra an' ireo malemy sy osa, izay tsy manan-kanoherana ireo mpanao tsindry hazo lena na kely tsy mba mamindro 
Enti-milaza ny olona osa na madinika na mahantra izay tsy mba afaka hamaly amin' ny herin' ny tenany raha misy mamely azy fa Andriamanitra no antenainy hamaly izay mampahory azy Marina ka mamaly ny ratsy sy ny tsara.

METEZA HO OLOM-PIRENENA VANONA! Natolotry RAMASINIRINA