FANDRAISANA  ANJARAN’NY  OLOM-PIRENENA  AMIN’NY FIAINAM-PIRENENA

« Ao anatin’ny Firenena demokratika dia manapaka ny maro an’isa, manan-jo ny vitsy an’isa. Mana-jo hanapaka ny maro an’isa nefa voaaro  koa ny zon’ny vitsy an’isa».  Io foto-kevitra hijoroan’ny demokrasia io dia tsy vaovao amin’ny fahendrena Malagasy satria ny ohabolan-drazan-tsika dia manamarina fa efa ela no nifanaja sy nifampitsimbina ny fiaraha-monina Malagasy.

Ny hoe « aza mandidy dia homana»,

Dia tsy inona tsy akory fa fankatoavana ny hevitry ny maro an’isa sy fitsipahana ny didy jadona mety hiseho eny anivon’ny fiaraha-monina ka mety hiitatra eny amin’ny lafim-pitondrana no nampiasana io fomba fitenenanana io. Hoy ihany ny ohabolan-drazantsika hoe:

Aza hanaovana didy boraingina Ralaikamboty.

Mba hanakanana ny mpanapa-kevitra tsy hanao didin’ny be sandry amin’ireo madinika ao anatin’ny fiaraha-monina koa no namoahana ity karazam-pitenenana ity;

Mahakasika ny fifmpitsimbinana sy ny fifanajana indray dia  hoy ihany ny ohabolantsika hoe:

Aoka atao vero am-bala: ny lava tsy hanosihosy ny fohy, ny fohy tsy hamingana ny lava

Raha ireo rehetra ireo no akapoka ho iray dia azo ambara fa tsy tokony ho vaovao amin’ny foto-pisainana Malagasy ny “demokrasia”, saingy ny tsy ahazakan’ny maro azy amintsika amin’izao fotoana izao dia, satria tsy nisy nampianatra antsika handala intsony itony fahendrena nifotoran’ny “fanahy no olona” itony. 

Matetika aza isika rehefa miresaka eny anivon’ny fiaraha-monina eny dia miteny mandrakariva hoe “ranona tsy mahatanty demokrasia”. Zary ataotsika tsianjery maimbo fotsiny anefa io fitenenana io satria isika milaza izany indrindra no tsy manaja ny hevitry ny hafa matetika, na koa tsy mety hiady hevitra akory fa mikombo-bava na dia efa  hitsahan’ny sasany hatrany an-tampon-doha aza! Dinidiniho àry ity ohabolana ity dia hamarino ny dia:

Raha izy no mahandro patsa, tsy maninon-tsy maninona, fa raha izahay no mitono toho, dia ovany ho mandany laoka