Iza moa i Rabehasina Gabriel na Gabhy iray tamin’ireo Kintana telo ?  

MPISEHATRA SY MPIHIRA

Ny 04 Martsa 1933 no teraka tany Fianarantsoa i Rabehasina Gabriel mitovy tsingerintaona nahaterahana amin’ny Jean Joseph Rabearivelo i Gabhy.

Niakatra teto Antananarivo izy ny taona 1949, ny teatra no nanombohany nilalao tao amin’ny tropy Telonohorefy izay notarihan’i Justin Rajoro, nisehatra ihany koa tao amin’ny tropy Rosaflury, ny tropy Imaintsoanala ary ny tropy JJ Tseheno.

Nanomboka tamin’ny 1958 dia teraka ny antsoina hoe « Gala de Chant na Rindran-kira », dia ilay fampishoana hira ranofotsiny tsy ao anatin’ny tantara. Maro ireo mpamoron-kira naka an’i Gabhy hikalo ny sangan’asany toa an’i Noelson Lalao, Ramano, Louis Rasoanaivo, Roland Raelison, Ramaroson Wilson, Gilles Ramiarison, Dany Ranoa, Rakotondrazafy Jean Jacques, Fred Raolifahanana, JJ Tseheno, Momonjaona, André Titys, Ratsaramiafara Jean.

Maro ireo sangany no nampiaram-peo tamin’i Gabhy, ny lehilahy nahitana an’i Ossy, André Titys, Romule, Gilles Ramiarison, Gigi Bernard Randrianarison, Salomon, Roussel, ny vehivavy indray, Célestine, Henriette, Fara, Pauline Rabehasy, Flheur, Mbolontsoa Nelle, Zety, Mely,Razay, Mavoarisoa, Sahondra Lily, Lizah. Manavanana an’i Gabhy avokoa na hiran’olon-tokana, na olon-droa, na olon-telo, na ny rodobe, ny feo rehetra afa tsy ny beso. 

NY KINTANA TELO SY NY TARIKA GABHY

Tamin’ny taona 1983, Aubry avy ao amin’ny tarika Mahefa no nanana hevitra hampiakatra an-tsehatra miaraka an’i Gabhy, Romule, sy Salomon. Feno hipoka ny trano tamin’ny fampisehoana voalohany.

Kintana Telon’i Madagasikara no anarana nofidian’ny mpikarakara taorian’io dia tsy afaka intsony ilay anarana, maro ireo mpikarakara fampisehoana no mitaky ny fiakaran’izy telolahy miaraka an-tsehatra, tsy teto Madagasikara ihany fa tonga hatrany Frantsa, Korea Avaratra ny Kintana telo. Na dia eo aza ny Kintana Telo dia samy nanana ny mpihirany sy ny mpitendriny izy telolahy ary samy afaka mandeha mitokana na koa miara-mihira amin’olon-kafa. Gabhy dia nanana ny tariny, ka Lizah no mpihira raikitra niaraka taminy hatramin’ny nijoroan’ny Kintana Telo, Randrianarisoa Michel sy NR Raseta kosa no mpitendry zava-maneno naharitra indrindra tao amin’i Gabhy.  

NY NAMPIAVAKA AN’I GABHY

Rehefa hiaka-tsehatra i Gabhy dia tsy maintsy manao fitafiana mianjaika, ho fanajana ny zava-kanto sy ny mpijery no anton’izany hoy ny fanazavana.

Na amin’ny fiainana andavan’andro aza dia tsy miala palitao sy karavato i Gabhy, mbola fanomezan-danja y mpanankanto ny dikan’izany.

Sarotiny i Gabhy eo amin’ny famerenan-kira ary rehefa fampisehoana dia tsy azo am-pifamadihana ny nandaharany ny hira.

Ny tononkira sy ny nandrindran’ny mpamorona ny hira  dia tsy eken’i Gabhy ny hanovana na hikitihana azy, efa maro ireo mpikarakara lanonana niantso an’i Gabhy hihira amin’ireo fampisehoana izay manova ny hira amin’ny tsy tokony ho izy. Nolavin’i Gabhy daholo izany na dia nanamby vola be aza.

Eo amin’ny fitondran-tena indray dia tsy mikasika zava mahadomelina, tsy  misotro kafe, tsy mihinan-tsakay i Gabhy, ireo mpiara mihira sy mpitendriny koa dia manaraka izany.

Fa tsy mpihira fotsiny i Gabhy, fa sady mamorona ny feony no manoratra ny tonony, mpikambana mavitrika teo amin’ny Havatse Upem izy.  

GABHY SY NY FEON’IMERINA

Vao misokatra ny Radio Feon’Imerina ny maraina dia ilay hiran’I Ratsaramiafara mitondra ny lohateny hoe: “”Haody ry Analamangako” no heno voalohany, Gabhy no manao ny fasin-kira ao anatin’io, Célestine sy Henriette ary Gigi, Tseheno kosa no mitendry ny hira.

Gabhy no mpanankanto nanantona voloalohany ny Radio Feon’Imerina, izy ihany koa no manana ny sangan’asa maro eto amin’ny Feon’Imerina.

Nandray anjara hatrany i Gabhy tamin’ny fampisehoana maro nokarakarain’ny Radio Feon’Imerina, Tamin’ny fankalazana ny faha-roapolo taonan’ny kintana telo sy ny faha 55 taona niakaran’i Gabhy an-tsehatra dia ny Feon’Imerina no mpampahalala vaovao navitrika indrindra.

Ny Sabotsy 07 Febroary 2009 dia narary i Gabhy voatery nampidirina Hopitaly. Nandray andraikitra ny Feon’Imerina tamin’ny fanatontosana ny fampisehoana hitadiavam-bola nitsaboana azy. Noraisin’ny Feon’Imerina an-tanana ny fikarakarana ny taratasy fahazoan-dalana teny amin’ny kaominan’Anatananarivo Renivohitra. Nomen’ny PDS Guy Rivo Randrianarisoa maimaim-poana ny tranompokolona Isotry.

Tamin’ny Alarobia 25 Aogositra dia nampidirina hopitaly indray i Gabhy, nandray adidy ny Feon’Imerina nanao antso ho an’ireo mpankafy ny kanto mba samy hitondra ny anjara birikiny amin’ny fitsaboana azy.

Feon’Imerina no radio mandeha ao an-tokantranon’i Gabhy, ary Radio Feon’Imerina koa tsy  maintsy mandefa hiran’i Gabhy.

Ny azy rahateo no be mpangataka indrindra amin’ny antso an-tariby.

Nodimandry ny 21 aogositra 2010 I Gabhy, ka vahoaka maro no tonga nanome voninahitra azy, nanomboka teny amin’ny hopitaly Soavinandriana, tetsy amin’ny tranompokolona Analakely, teny am-piangonana FJKM Anosipatrana, teny Ilanivato fasan-drazany.

Tehaka mirefondrefotra no nataon’ireo mpanotrona satria izany rahateo ny hafatra napetrany. Ny mpitondra nifandimby dia samy nanome mariboninahitra azy avokoa. Nomena azy farany ny Grand Croix de deuxième classe, mari-boninahitra efa vonona hatramin’ny taona 2008 saingy niandrasana ny tsingerintaona fahaenimpolo niakarany an-tsehatra ny fanolorana azy  saingy tsy izany ny lahatra.