Fombantsika malagasy ny mitsena ireo maherifontsika tonga avy any ivelany, efa hatramin'izay mihitsy. Mety ho olon-tokana izany na andian'olona, ny anton'ny fitsenana dia mazava ho azy fa fankasitrahana ny zava-bita sy fanomezam-boninahitra. Indro atolotra anao santionany tamin'ireo fitsenana efa nataon'ny vahoaka.

IREO MIARAMILA NIADY

Maro ireo miaramila malagasy nalefa tany an-dafy nanampy ny frantsay tamin'ny ady lehibe voalohany ( 1914-1918) sy ady lehibe faharoa (1939-1945) sy ny ady hafa toy ny tany Alzeria sns. Rehefa vita ny ady dia mody soa aman-tsara an-tanindrazana ireo miaramila sisa tsy maty. Tonga maro nitsena azy ireny tany amin'ny seranan-tsambo tany Toamasina, na teny amin'ny Garan'i Soarano ny vahoaka malagasy, Ny mampalahelo anefa tamin'izany, dia misy ireo fianakaviana taty an-tanindrazana tsy mahalala hoe maty na mbola velona ny havany, fa dia tonga mitsena fotsiny, raha hitany eo moa dia velona soa aman-tsara izany dia arahabaina, raha tsy tonga kosa dia hafoy toy ny maty rehetra.

TAMIN'NY 1960

Rehefa nambara fa hiverina ny fahaleovantena tamin'ny taona 1960, dia fitsenana goavana no natao an'ny Filoha Tsiranana Philibert tonga avy any Frantsa izay nambara fa « rain'ny fahaleovantena » Ny volana Jolay 1960, efa niverina ny fahaleovantena, no nampodiana an-tanindrazana izy telo mirahalahy mpitarika ny MDRM, izay nalefa sesi-tany tany Frantsa dia i Dr Raseta Joseph sy Dr Ravoahangy Andrianavalona sy Rabemananjara Jacques. Vahoaka marobe no tonga nitsena azy telolahy teny amin'ny seranam-piaramanidina, mbola teny Arivonimamo tamin'izany

Feno olona ny lalana nolalovana hatraty Antananarivo

TAONA 1970

Narary ary notsaboina am-bolana tany amin'ny hopitaly « La Salpetrière » tany frantsa ny Filoha Philibert Tsiranana rehefa sitrana izy, ka nody an-tanindrazana dia vahoaka marobe no tonga nitsena azy teny Ivato. Ny taona 1970 ihany koa dia nahazo ny fandresena tamin'ny fiadiana ny tompon-dakan'i Afrika ny mpilalao Basket ball zazavavy malagasy. Vahoaka marobe no tonga nitsena azy ireo teny Ivato.

TAONA 1973

Nisy ny fanavaozana ny fifanaraham-piaraha-miasa Frantsay sy Malagasy. Ny Ministry ny Raharahambahiny tamin'izany, Ratsiraka Didier sy ny Ministry ny Toekarena sy Fitantanam-bola tamin'izany Ramaroson Albert Marie no nitarika ny delegasiona teo amin'ny fifampiraharahana

Vita tany Frantsa ny fanaovan-tsonia ilay fiaraha-miasa nasiam-panavaozana. Nody ireo delegasiona ary notsenaina tamim-boninahitra teny amin'ny seranam-piaramanidina teny Ivato, ary hatraty Antananarivo dia feno olona nihoby azy ireo

TAONA 1989

Tonga teto amintsika ny Papa Joany Paoly II tamin'ny taona 1989. Sambany teo amin'ny tantaram-pirenena no nisy Papa ray masina, Filoha ambonin'ny Eglizy Katolika Romana tonga teto amintsika. Tonga nitsena sy nihoby ny Papa avokoa ny kristiana katolika maro teto Antananarivo sy manerana an'i Madagasikara, marihina fa tsy ny mpino katolika ihany fa ny malagasy rehetra mihitsy.

TAONA 1996

Tsy lany filoham-pirenena Andriamatoa Ratsiraka Didier tamin'ny taona 1993, nifindra monina tany Frantsa ny tenany. Tratran'ny fampiatoana ny Pr Zafy Albert ka voatery tsy maintsy hisy indray ny fifidianana filoham-pirenena

Nody an-tanindrazana Andriamatoa Ratsiraka Didier ny volana Aogositra 1996 fa hilatsaka hofidiana indray, tonga nitsena azy teny Ivato ireo mpomba azy.

NY 19 FEBROARY 2011

Ny Sabotsy 19 aprily 2011 no nandrasana teny Ivato ny Filoha Ravalomanana Marc. Nosakanan'ny Fat tsy hiditra eto anefa ny fiaramanidina nitondra azy.

Ny azo lazaina dia hipoka tanteraka ny lalana avy any Talatamaty hatreny anoloan'ny fidirana amin'ny seranam-piaramanidina. Tsy tonga izy, ary maro ireo nalahelo, betsaka no tezitra.

NY 14 JOLAY 2019

Nakotrokotroka tokoa ny fitsenana ny BAREA, mpanao baolina kitra Malagasy avy nanao fifanintsanana tany Le Caire, ary tsy raraka raha tsy teo amin’ny ampahefa-dalana. Mbola tsy nisy hamaroan’ny olona tonga nitsena toy izany hatramin’ny 59 taona lasa hoy ireo mpitantara. Hatrany Ivato, Tsarasaotra, Ivandry, Akorondrano,Antanimena, Analakely, Ambohidahy, Mahamasina dia rakotra vahoaka.