Amin’izao fiandohan’ny taona izao no fanehoam-pihavanana. Matetika anefa isika no solafaka fa manao fitondra-mitanila rehefa maneho fihavanana. Anarin’ny Ntaolo àry isika ka ilazany hoe:

Aza atao toy ny fively amponga ny fihavanana ka ny iray ambaviny tambatambazana, ny iray andahiny dobodobohana

Ny amponga dia nanan-danja tamin’ireo zava-maneno teto Imerina. Izy no manome ny bàn-kira. Ny antsika ny mozika dia ny firindrany no tena zava-dehibe satria nampitoviana tamin’ny firindran’ny fiarahamonian. Ny mozika no namindra ny fahalalahana sy ny soatoavina tamintsika taranaka. Nitahiry ny tantarantsika koa ny mozika. Amin’ny zava-maneno misy tadiny ohatra dia ny be feo no ambaviny. Amin’ny amponga dia ny lafiny iray ambaviny , ny iray andahiny. Noho ny fandrindrana ny feo dia ny iray velezina mafy ny iray kosa velezina somary malemilemy. Tsy azo atao toy izany ny fihavanana satria eo amin’ny fiaraha-monina, mifandrindra ny lahy sy ny vavy. Ny Ntaolo Malagasy dia efa nahalala ny mira lenta. Aza adinoina fa ny reny no mpitaiza ny taranaka ka matetika mifandray kokoa amin’ny Havana ny lafin-dreny. Adidin’ny reny no mampianatra ny zanany tsy hanahaka ny amponga ka hanisy tombo sy hala amin’ny Havana satria tsy mahatsara fihavanana izany. Raha tiana ho olombanona ny taranaka, ampianarina manaja ny andaniny sy ny ankilany.

Hoy ny ohabolana:

Tsy misy tombo sy hala : fa ny iray vy nahitana, ary ny iray angady nananana.

Samy manana ny sokajiny ny zava-boahary rehetra  koa asaina handinika sy handanjalanja isika mianakavy amin’ny fitondrantena sy ny fitondran’olona ao anatin’ny fiaraha-monina ao.

Lafimbato, vato ; lafinkazo, hazo ; lafinkavana, havana.

Tsy mahasoa ny manome alahelo ny Havana satria efa voamarina teo amin’ny tantaram-piainan’ny ankabeazan’ny olona fa noho ilay rohim-pihavanana, nateraky ny rà niraisana sy ny loharano nipoirana. Tsy mifanary ny mpihavana, raha manana toetran’olombanona tokoa

Aza ny havana no Asian-dratsy, fa tsy ho tratry ny hafa tsy akory.