Teny fiarahabana fony fahiny tamin’ny ny fahampanjaka io. Ampiasaintsika kosa ankehitriny ho an’ireo izay heverina ho mendri-kaja sy voninahitra eo anivon’ny fiaraha-monina ary atolotry ny mpitantana sy ny mpiara-miasa rehetra  eto amin’ny gazety sy radio feon’Imerina ho anao mpihaino sy mpamaky, miara-dalana sy tsy mahafoy ny soatoavina. Isika izao no toy ny rano sy vary, tsy mifanary na an-tsaha na an-tanàna. Arahabaina nahatratra ny taona vaovao 2021. Ho tratry ny taona arivo mitsingerina, hangidy lavitry ny faty ary ho mamy tian’ny vola anie isika mianakavy.

Efa taona maro nifandimby no nandia fotoan-tsarotra ny firenentsika. Antenaina fa hitombona kosa amin’ity taona 2021 ity ilay ohampitenenan-drazantsika manao hoe “Ny hisavorovoroan-kilantoana”. Hiezaka isika mianakavy hampanjaka ny fahendren-drazana ka hamoha indray ilay herim-panahy ao anatintsika handalana tanteraka ny fihavanana sy ny firaisankina.

Ary ataontsika fanoitra hampitraka antsika ilay tenin’ny Ntaolo manao hoe “Ny fositra ve no tsy ambolem-boavahy?” Alao hery àry fa ny taon-trano tsy efan’ny irery, ny entan-jarai-mora zaka, ny hanin-jarai-mora lany ary ny adidy tsy an’olon-dratsy. Manasa anao  hanatanteraka ny hafatry ny Ombalahibemaso izay noraisintsika ho teny faneva eto amin’ny Feon’Imerina manao hoe “Tsy adidiko izaho samirery fa adidiko izaho sy ianareo”. Raiso ho adidy ny fandrindrana ny fiaraha-monina mba tsy resy tondro maso eo anatrehan’ny tantara sy ny taranaka fara-mandimby. Ny taranaka no imatimatesantsika mianakavy ary antony voalohany nitsanganan’ny mpitantana sy ny mpiara-miasa eto amin’ny Feon’Imerina, niarahany nisalahy nampahatsiahy ny soatoavina entin’ireo vakoka sy  kalon’ny fahiny, nifantenana ny hiran’ny omaly sy ny ankehitriny mba hampitana hafatra amin’ny solofo dimbin’ny ala sy ho fampandraisana anjara azy ireo. Ny velona ankehitriny no manao ny tantarany ka enga anie ny tantara havelantsika ho an’ny taranaka mba tsy handiso fanantenana azy ireo.

Ento àry ny anjara birikinao hamelomamaso an’I Madagasikara. Ny fanehoana ny fanahy no olona amin’ny fampanjakana ny marina, ny rariny ary ny hitsiny. Ny tsy firaisana tsikombakomba amin’izay rehetra mety hampidi-kizo ny tena sy ny namana satria efa nampianarin’ny fahendrena Malagasy isika mba hifampitsimbina, hifanaja sy hifampatoky fa izay no tena olom-banona.

Izay no ela fa manantitra ny arahaba ombam-pirariantsoa, ho lasan’ny taona 2020 ny ratsy rehetra!