Feno 125 taona tamin'ny Alahady teo ny 22 Novambra 1895, vaninandro manana ny toerana eo amin'ny tantaram-pirentsika. Zava-dehibe anankiroa ny voarakitr'io vaninandro io satria, tamin'io no nanaovana ny fandroana farany tamin'ny fahampanjaka, mifanindry amin'io andro io ihany koa ny nanombohan'ny hetsiky ny Menalamba tia tanindrazana nanohitra ny frantsay. 

NY FANDROANA

Raha tsiahivina fohy dia tamin'ny fanjakan'ny Mpanjaka Ralambo, nihinanana ny hen'omby voalohany no nanomboka ny fankalazana ny fandroana. Ny foto-kevitra nijoroan'ny fandroana arak'izany fiantsoana azy izany, dia fidiovana, fialana amin'ny ratsy ary fidirana ho amin'ny tsaratsara kokoa, ankoatr'izay dia fanamafisam-pihavanana ankapobeny, eo amin'ny mpitondra sy ny vahoaka, eo amin'ny zanaka sy ny ray aman-dreny, eo amin'ny samy vahoaka. Mahazo laka ny fifanajana amin'izany toy ny fanolorana solombodiakoho ho an'ny ray aman-dreny sy solom-penakoho ho an'ny zanaka.

Niovaova araka ny mpanjaka nitondra ny fotoana nankalazana ny fandroana, nanomboka tamin'ny fanjakan'ny Mpanjakavavy Ranavalona III dia ny 22 Novambra no nankalazaina ny fandroana.

Ity 22 Novambra 1861 no teraka ny  Mpanjakavavy Ranavalona III, feno 22 taona ny 22 Novambra 1883 izy no napetraka teo amin'ny seza fiandrianana.

Ny 30 Septambra 1895,dia nisy ny tifi-tafondro nataon'ny frantsay niainga teny Andrainarivo, niteraka ny fananganana saina fotsy ary niafara tamin'ny mahatany eo ambany   fiahian'ny frantsay antsika ny  01 Oktobra 1895. Na dia nosoloina an'i Rainitsimbazafy aza ny Praiministra Rainilaiarivony, dia mbola nijanona ho mpanjaka ihany Ny Mpanjakavavy Ranavalona III ,  saingy tsy manana fahefana, fa ny Résident Général Duchesne no tompon'ny fanapahan-kevitra rehetra. Mbola nahazo nankalaza ny fandroana ny Mpanjakavavy ny 22 Novambra 1895. 

NY HETSIKY NY MENALAMBA

Maro ny tia tanindrazana malagasy, tsy nahazaka ny fahitana ny mpanjakavavy baikon'ny frantsay, tsy nanary toky izy ireo ka nanomana hetsika. Tany Amboanana any amin'ny faritra Arivonimamo dia nisy mpirahalahy nantsoina hoe Razafivoavy sy Benahy, malaza ho mahery setra izy roalahy ireo.  Ny 22 Novambra 1895 andron'ny fandroana, no nanomboka ny hetsika notarihan'izy ireo.

Namono misionera mpitondra fivavahana vahiny, nandoro trano fiangonana ary nanao haza lambo ireo vazaha no fototry ny hetsika. Rainisongomby sy ilaitangena no solon'anarana nentin'izy roalahy ireo. Menalamba no anarana nisaloran'izy ireo, satria naloto ny lamba notafian'izy ireo, tsy nanam-potoana nanadiovana ny lambany noho ny fahamaizana hamonjy ny tanindrazana. Misy koa ireo niantso azy ireo hoe fahavalo ho fanaratsiana ny hetsika nataon'izy ireo.

Ny mpitondra fivavahana sy ny trano fiangonana no nataon'ny  Menalamba lasibatra, satria tsapan'izy ireo fa anisan'ny fomba ankolaka nidiran'ny fanjanahantany ny fivavahana kristiana, tsapan'ny Menalamba koa  ny fahamarinan'ny hevitrin'ny mpanjaka Andrianampoinimerina sy ny Mpanjakavavy Ranavalona I. Efa tamin'ny taona 1897 vao nijanona ny hetsiky ny Menalamba.