Feno 25 taona katroka amin’izao 06 novambra 2020 izao, ny nandoroana ny tanàna Masina Anatirova. Fotoana mangidy indrindra ho antsika teto Imerina izany, satria ilay vakoka goavana nirakitra ny harentsaina sy ny fahendren’ireo mpanjakantsika no may kila hotohoto tamin’io andro io. Mbola manjaka ao am-po ny takaitra navelan’izany setrasetra mahatsiravina izany.

Inona ny zava-nitranga?

Ny Alahady 05 novambra 1995 no natao ny fifidianana ben’ny tanàna manerana an’i Madagasikara. Ny ampitso Alatsinainy dia efa fantatra ny vokatra ka ho an’Antananarivo dia Andriamatoa Razanamasy Guy Willy no voafidy.

Io Alatsinainy maraina io dia nisy hain-trano nitranga teo amin’ny Ministeran’ny Fitantanam-bola tetsy Antaninarenina, marihina fa ny Praiministra Ravony Francisque no nisahana ny Ministeran’ny Vola no sady Lehiben’ny fitondram-panjakana.

Ny hariva  no nirehitra ny Rovan’Antananarivo, ka kila avokoa ireo lapa maro, hatramin’ny Tranomasina sy ny trano Fiangonana. Niolomay Antananarivo Renivohitra, vetivety dia niely eran’ny nosy sy manerana an’izao tontolo izao ny vaovao. Nivarahontsana izay nandre, maro ny latsa-dranomaso, nifangaro ny alahelo, ny hatezerana sns.

Taitra ny ambom-po

Raha ny fahitana ny afo dia tsy azo iadian-kevitra fa nodorana ny Rova, fa tsy hoe may tsinahy akory, satria haingana dia haingana ny fihitaran’ny afo. Niezaka namonjy na ny vahoaka na ry zareo mpamonjy haitrano saingy tsy nisy ny azo natao, fanaka vitsivitsy no voavotra tao anaty afo.

Maro ireo fikambanana nitsangana hanarina ny Rova. Fampisehoana goavana no natao teny amin’ny Kianjaben’i Mahamasina, nanangonana vola. Nihetsika hatramin’ireo zanak’ampielezana tany ivelany. Nijoro ny herinandro taorian’ny 06 novambra 1995 ny Fikambanana Andohalo, izay naneho am-pahanginana ny tsy fankasitrahana ny zava-nitranga, sady nampitony ny vahoaka, no nampisaintsaina ny rehetra samy handinika izay tokony hatao. Isaky ny 06 novambra dia manokana fotoana eny Andohalo ny Fikambanana Andohalo, maneho hevitra am-pahanginana sy mitaky ny fanarenana ny Rova sy fiarovana izay mbola mijoro.

Tamin’ny 06 novambra 2005 no nisy farany ny fihaonana satria nanapa-kevitra ny fitondrana tamin’izany fotoana fa hirosoana ny fanarenana ny Rova may tamin’ny folo taona lasa.

Ny zava-misy ankehitriny

Mbola ao anatin’ny asa fanarenana ny fitondram-panjakana, ary ireo rindrina ivelany aloha no vita fanamafisana fa ny anatiny mbola tsy voakasika. Tsy nahamaika velively ny hanarina manontolo ny Rova, fa ny nanangana foto-drafitr’asa ivelany no nosahanina, di any fananganana ny Colisee izany. Maro no tsy manaiky ny nananganana izany Colisee izany, ka mihevitra mihitsy fa fandorana fanindroany ny Rova ny fitokanana io zavatra io ny andron’ny 6 novambra.

Very Hasina tanteraka ny Rova satria tsy vitan’ireo Andriana izay tokony ho lohalaharana amin’ny famelomamaso izany Hasina izany ny niaro azy.

Ho anay eto amin’ny Feon’Imerina, dia zava-dehibe ny fanarenana ny trano sy ireo fanaka maha Rova ny Rova, fa mbola manan-danja bebe kokoa ny famelomana ao am-po sy ao an-tsaina ny afom-pitiavan-tanindrazana nananan’ireo mpanjaka teo aloha, sy ny ambom-po ho sahy hijoro hatrany, hikajy ireo harentsaina sy soatoavina nampiavaka antsika, ho vavombelon’ny tantara. Tsy vitan’izany ihany fa adidy sy andraikitra ny mampita izany ho lovan’ireo taranaka fara amam-dimby.