Inoan’ny malagasy fa mahamora ny fihavanana ny fitandremam-pitenenana. Na miady aza ny olona, heveriny fa metimety kokoa ny misaraka tsy misy maratra. Eo ilay hoe “tsy maratra ny vatana fa indrindra indrindra koa ny fanahy”. Ny ratra ety ivelany mety ho sitrany ihany fa ny anaty no tena sarotra sitranina:

Aza manao anaty fo maharary, hoy Andrianampoinimerina.

Anisan’ny fanehoana izany fitandremam-pitenenana izay ny teny malemy.sy ny teny miera.

Ity farany no azo adika ho fifaneken’ny mifampiraharaha. Fifampiraharahaina tokoa no ao anatin’ny fiarahamonina:

Ny ahiahy tsy ihavanana

Tsy misy asa vitan’olontokana izany. Mba ahefana ny izay efa nokasaina na ho kasaina atao mba tsy hanenenana amin’izay vita. Io ilay mitsinjo lavitra fa ao dia ao tokoa ny fifampitsimbinana amin’ny mpiara-monina. Velona hifanasoa sy tsy hifanisy ratsy. Misy fotoana tsy maintsy iaraha-monina ka arindra aloha iny fotoana iny mba hahamora ny fiainana: tsy midika ho fihatsarambelatsihy io ka hoe:

Matin-kena-maso, ka mihinam-barim-boka.

Toetra fahaenina ijoroan’ny firaisakina sy ny fihavanana napetrak’Andrianampoinimerina ny tsy fisian’ny henatra sy ny tsy fisorohana raha tohatra ny sarotra. Ny matin-kenamaso ka manaiky izay haroson’ny olona na mamoafady ny tena aza dia mahavery hasina ny olona anankiray. Ny fifandrindrana tsy midika velively fa fanekena tsy misy fepetra ny ataon’ny mpiarabelona na ratsy na tsara. Ny olombanona tokoa tsy menatra ary tsy misorona manoloana ny sarotra. Sarotra ny mandà sakafo aroson’ny olona ny tena saingy raha hitondra loza toy ny aretina ohatra , tsy maintsy mandà izany.

Matim-pitia toa lalitra ka mitsoboka alohan ny sotro

Sarotra toy izany koa ny manitsy ireo tia mitsabatsabaka amin’ny sakafo, toy ny fanahin’ny lalitra ohatra, saingy raha tsy te ho voavetaveta, tokony hijoro ka tsy hanaiky izany.

Tsy mampirindra ny fiaraha-monina ny fanarahana ambokony. Ny olona manaraka ambokony manko karazan’ny tia tena ihany, tsy te ho voatohitohina mivantana ka raha mbola tsy mahavoa azy ny ratsy na ny tsy mety ataon’ny fiaraha-monina dia mangina tsy miteny izy. Toetra fahaefatra ijoroan’ny fihavanana sy ny firaisankina koa anefa ny tokony tsy isian’ny fitiavantena satria anisan’ny mampikorontana ny fiarahamonina.

Rafotsibe miandry ombilahy ka manaraka ambokony

Raha fehezina, ny fitandremam-pitenenana sy ny fihetsika mifanaraka amin’izany, tsy inona akory fa fitandremana ny fahamarinana. Raha mihoatra na tsy ampy ny teny ampiasaina, tsy mazava ny hevitra ary diso ny fihetsika sy ny fitondran-tena heverina ho mifanahaka amin’izany. Miankina amin’io fihetsika io anefa ny mampirindra na tsia ny fiarahamonina.

METEZA HO OLOM-PIRENENA VANONA, Ramasinirina