Hoy I Koffi Annan fony izy Sekretera Jeneralin’ny Firenena Mikambana, raha niresaka ny “olom-banona” ao anatin’ny firenena demokratika: “Tsy misy olom-pirenena tonga dia olom-banona, ary tsy misy firenena tonga dia demokratika hatrany am-piandohany”

Araka izany, na ny atao hoe olom-banona na ny demokrasia dia samy dingana mitohy mandritra ny androm-piainan’ny olom-pirenena iray manontolo. Toetra anankiray dradradrain’izao tontolo izao mahalavorary ny maha olom-banona sy ahatongavana any amin’ny demokrasia ny fandeferana. Tsy ambakan’io fiheverana io ny filozofia Malagasy mifototra amin’ny “fanahy no olona”.

Maro ny ohabolana Malagasy no mampianatra antsika mba handefitra. Tsy fandeferana mba hanekena ny fanitsakitsahina ny rariny sy ny hitsiny anefa fa  mampianatra kosa tsy hibahan-toerana na hanampatra hery sy fahefana. Heverin’ny Ntaolo fa manana ny anjara-toerany ny tsirairay ao anatin’ny fiaraha-monina ka izany no tokony hifampitsimbinana  mba hampirindra azy, satria

“Ny akondro no mivonkina dia toeran-kifandeferana”

 Tsy mahafaty antoka ny mandefitra amin’ny toe-javatra ilàna izany ka hoy indrindra ny Ntaolo:

“Lohalika no komavoka: mihenjana; leferana no mandina; mandefitra”

 Mazava be ny sary asehon’ity ohabolana ity. Azo tsapain-tanana ny fahamarinany raha ny zava-mitranga eto Madagasikara, noho ny tsy fahaizan’ny mpanao pôlitika mandefitra amin’ny lafiny maro. Fampiasan-kery, fifandrafiana, fifamitahana, izany no isarihantsika ny mason’izao tontolo izao.

Voamarika kosa anefa fa misy amin’ireo mpanao pôlitika sy mpitarika isan-tokony izay tsy mitsahatra mampiseho fandeferana no tonga amin’ilay ohatra hoe:

“Mahay mandefitra ka tsy ory olon-tiana”

 Ny fandeferana anefa dia miaraka lalandava amin’ny fanajana ny rariny ka hoy ihany ny ohabolana: “Tsy fanao ny mandefitra manana ny marina sy ny fatra-pandefitra toy ny mpivaro-tantely: ny tompony indray no milela-tanana”.  Ary koa: “Ny tsy mahandry ny rariny, nefa milaza ho mpandefitra”.

METEZA HO OLOM-PIRENENA VANONA, Ramasinirina.