Firenena efa nahaleotena i Madagasikara tamin’ny faha mpanjaka, efa nanana sainam-pirenena isika tamin’izany.

Nony tonga ny fanjanahantany dia ny sainam-pirenena frantsay no nikopakopaka teto amintsika. Rehefa niverina ny fahaleovantena tamin’ny 26 Jona 1960 dia nanana ny sainam-pirenena amin’izay isika, miloko telo soratra, fotsy mitsangana ary ny mena sy maitso mitsivalana manolotra ny fotsy ka ny mena no eo ambony, marihina fa mitovy refy ireo  loko telo soratra.

Fanevam-pirenena ihany koa no azo iantsoana azy, saingy ny saina, no mahavantana ny vahoaka, satria nampitoviany amin’ilay saina ao anatin’ny loha mampiavaka antsika olombelona ny fananana azy. 

MANANA SAINA AVOKOA NY REHETRA

Tsy ny firenena ihany no manana saina, fa manana ny azy koa ny faritany enina, ny faritra 22, ireo fikambanana iraisam-pirenena, ireo, antoko politika, fikambanana, sekoly, tarika samihafa sns.

Ny saina no iavahan’ny tsirairay amin’ny hafa. Atsangana amin’ny fotoana ilàna azy ny saina. Saropady koa anefa ny saina, ka tsy azo atao ny manangana azy amin’ny fotoana tsy tokony hanaovana izany.

 NY SAINA HANAJANA NY MATY

Tamin’ny 15 Martsa 1897, dia noloarana teny amin’ny Rovan’Ambohimanga ny taolambalon’ireo mpanjaka nalaza toa an’Andrianampoinimerina, Ranavalona I, Ranavalona II, sns.. nentina niakatra ary nafindra tao amin’ny Rovan’Antananarivo.

Famerezan-kasina no azo ilazana izany, ny tranomasina roa eo Anatirova dia natao ho an’ny mpanjaka Radama I sy ny mpanjakavavy Rasoherina ary ny mpanjaka tsy azo ampiraisina fasana na ny mpivady aza. Avelantsika eo iny fa mbola resaka manaraka, fa ny tiana ho tsiahivina rehefa nentina niakatra ny taolambalon’ireo masina dia noravahana saina frantsay ny kalesy nitondra azy, vao mainka fanaovana tsinontsinona ny masina izany,marihina anefa fa  nanomboka teo dia lasa fomba ny mitondra saina rehefa mitondra razana na maina io na lena.

Ankehitriny raha misy faty lena handeha lavitra dia asiana saina ny fiara mitondra azy, ary fanao koa ankehitriny ny mitondra saina rehefa mamadi-drazana. Izany dia fanehoana fa manana ny hasiny ny olona rehefa mody ho razana.

 NY FAMPIAKARAN-TSAINA

Fomba fanao mahazatra any amin’ny toeram-piasana, sekoly, toby miaramila ny fampiakarantsaina, amin’ny fiandohan’ny herinandro ary iarahana indray ny fampidinana azy rehefa faran’ny herinandro. Ny tanjon’izany dia mba ahatsapan’ny rehetra fa ny asa izay atrehina mandritra ny herinandro dia natao ho voninahitry ny firenena.

 NY SAINA FANANDRATANA NY FIRENENA

Ny sainam-pirenena dia niara teraka tamin’ny fahaleovantenam-pirenena. Ajoro sy akopakopaka ny sainam-pirenena hanehoana ny voninahi-pirenena, amin’ny fotoan-dehibe toy ny lanonana ara-panjakana,ara-politika, ara- kolontsaina, ara-panatanjahantena sns..

Ny saina no hanehoana fa mijoro ny firenena. Ankehitriny dia malaina ny ankamaroan’ny olona amin’ny fananganan-tsaina noho ny disadisam-piarahamonina mbola tsy mety miravina tanteraka. Betsaka ny adi-hevitra mandeha toy ny hoe tsy ny mpitondra no hananganan-tsaina satria tsy azy ny saina fa an’ny firenena Malagasy. Maro ny misafidy ny tsy hanangantsaina, satria mihevitra izy ireny fa ilay firenena mihitsy no voahosihosy ny hasiny, manjaka ny herisetra, tsy misy ny fahafahana, ary voaroba ny harem-pirenena, manoatra noho ny tamin’ny andron’ny vazaha.

Ny feon’ny fieritreretan’ny tsirairay no tokony hibaiko azy hanangana na tsia ny sainam-pirenena, fa fahadisoana ny manery mivantana na ankolaka ny olom-pirenena tsy hanao izay tsy sitraky ny sainy sy ny fony.