Voalaza fa ny fihavanana no fototry ny fahendrena sy ny
fiarahamonina malagasy. Ireo ohabolana sy fitenenana maro dia samy maneho izany
avokoa.
Na ankasoavana na ankaratsiana dia tsy maintsy misy foana ny
fifanotronana, ho fitsinjovana ny fihavanana no hanaovana izany. Ireo fomba
amam-panao samihafa toy ny didimpoitra, ny famadihana, ny fanambadiana, ny
fisaoram-bady ary hatramin’ny fandevenana dia hita taratra ao anatin’ny fomba
fanao ny maha zava-dehibe ny fihavanana.
Nisy ireo an-tokon’olona izay vao nankalaza ny taombaovao
Malagasy, anisan’ny fototra iorenan’izany, ny fanamafisam-pihavanana.
Eo amin’ny raharaham-pirenena dia omena lanja ny fihavanana
eo amin’ny samy Malagasy, matoa tsy misy ny ady an-trano eo amin’ny samy
Malagasy. Izany akory tsy milaza hoe milamina ny fiarahamonina. Misy koa anefa
ireo manararaotra ny fihavanana hanaovana ny tsy rariny amin’ny hafa,
endrik’izany ny asehon’ireo nahazo fahefana sasantsany eto amin’ny firenena.