Tao amin’ny “Royal missionary college” no natao ny fanadinana voalohany, izay natrehan-dRadama sy Hastie. Notronin’ny manamboninahitra sy ny andriambaventy ary ny havan’ny Mpanjaka sy ny vahoaka marobe. Nilamina sy nadio ny mpianatra ka vakivava hatramin’ny Mpanjaka no sady nilaza fa anisan’ny hitsarana ireto mpianatra ny zavatra hitan-drizareo.. Taranja maro no nianaran’ireto mpianatra sy nanadinana azy ireo: gramera,anglisy sy jeografia, artimetika nisy “fraction” tsotsotra, famoronan-dahatsoratra. Samy voavalin’ny mpianatra avokoa izay nanadinana azy , hatramin’ny katakizin’ny Dr Watts.

Nantsoina hoe “Ny roambinifololahy”, ny kilasy voalohany tao amin’ny kolejy. Ny roambinifololahy dia nahitana  an’I Rakotobe, zanaky ny Printsy Ratefinanahary sy ny Printsesy Rabodosahondra, anabavin-dRadama,  Raharolahy, Ratsimandisa, Ralemaholy, Rasatranabo, Ramaka, Ratsisetraina, Ramaka, Raboana, Rasoanitsiriana, Ratsitohaina.

Nitsidika ny kilasy faharoa no sady nampanao fanadinana tao Radama ka gaga fa tsy ambakan’ny kilasy voalohany ny sasany tamin’ny mpianatra tao. Tena nahavoa sora-tononina tamin’ny teny Malagasy sy anglisy ny mpianatra ary nahafolaka tsara ny fitenenana ny teny anglisy. Ny kilasy voalohany sy faharoa ihany moa no nanoratra tamin’ny kahie fa ny kilasy fahatelo , izay mbola nadinika dia tamin’ny solaitra ihany.