Efa nanomboka ny taona 1828 no nilana vanony ny misionera teto. Ny volana desambra 1828, dia nalaina ho miaramila ny mpianatra zokiny indrindra tao amin’ny Kolejy., ary ny volana febroary 1829 dia noroahina ny dokotera Lyall.

Ny alahady 5 aprily 1829 no namoriana, tao Ambodin’Andohalo ireo misionera.ka notaterina tamin’izy ireo ny tenin’ny Mpanjakavavy izay manao toy izao： ”Efa ela izao no nahatongavanareo ary efa be ny vitanareo, nefa ianareo olona manan-kavana sy tanindrazana, koa raha tsy misy intsony ny vaovao ampianarinareo, dia ‘ndeha itsy izy mody fa ny tenanareo mba malahelo tanindrazana ihany. Ary ny havanareo koa mba malahelo anareo”.

Toy izao kosa no navalin’ieo misionera ny hafatry ny Mpanajakavavy: “Lazao ny Mpanajakavavy Tompokolahy fa raha mbola tian’Izy tompony ny hampianaranay ny vahoakany, dia izao no teninay, vao ny hafaladia fa ny havozona mbola tsy nokasihana, fotopoto-javatra fotsiny no vita fa ny karazam-pahendrena samihafa, mbamin’ny tenim-pirenena lalina toy ny hebreo sy ny grika  dia vao nandramana fotsiny.

Niverina tany an-drova ny iraka ka nony avy eo dia izao kosa ny valin-teny nataon-dRanavalomanjaka tamin’ny misionera: “Raha ny teny hebreo sy grika, dia teny maty ka  tsy fiteny intsony, fa zavatra hafa tena mahasoa ny tany sy ny Fanjakana no ambarao. Manao ahoana ary moa, mahay mampianatra ny fanaovan-tsavony va ianareo?” Nanontaniana I Cameron sy Griffith ka nangataka herinandro I Cameron mba hamaliana ny hetahetan’ny Mpanjakavavy.

Rehefa niherina ny andro ka tonga ny irak’andriana hanontany ny momba ilay fanamboaran-tsavony dia nampiseho savony fotsy namboariny tamin’ny vokatry ny tany I Cameron. Faly ny Mpanjakavavy ary teraka teo ny fifanarahana teo amin’ny roa tonta. I Cameron sy Chick no hampianatra ny fanaovan-tsavony. Nomena savony fotsy ny Mpanjakavavy, nahazo fotoana hijanonana mandritra ny fito taona kosa ny misionera.