Be ny zanantsika no tsy tamana intsony eto an-tanindrazana

Indreo mifindra lasy manara-bolotany fa ny eto hono ngazana

Aleony ihany koa mitady izay ho soa  sy miremby an-tany hafa

Fa ny tany niaviany tototry ny atsanga tsy ho zakan’ny kifafa

Izay nahita lalana hamaky habakabaka nibata entan-kely

Ny tsy nanambola hatao sarandalana naketsy Analakely

Farafaharatsiny mahita ny mamiratra sy henim-boninahitra

Lasa olo-mandroso an-drenivohitra any nitady ravinahitra

Ny tombotsoa “hono” amin’ny filefana ny akany nibeazana

Dia ny nidifiana tamin’ny fahoriana fa anisan’ny mpitazana

Afa- mitsikera sy manome tsiny raha misy fahavoazana

Afa-mialangalana amin’ny andraikitra fa tsy teo an-tanindrazana!

Dia indreo ny mailaka amin’ny serasera fa tena totoafo

Malagasy inona no monina ao Dago, tsy sasatra mandafo

Ny harena, tsy miaro kely akory ny fiandrianam-pirenena

Olom-boahozona,  tsy mahalala izay mba hiaro tena

Iry nifindra monina avy any ambanivohitra io fa miala bala

Tsy mety mampandroso ny toera-nivantanany fa izy mbola hiala

Ny tany izay nilaozany, efa nohadinoiny tsy iraiketan’ity fony

“Citoyens du monde” izay no tarigetrany sy apetrany ho ambony!

Dia io fa tena mihanjaka, tsy nisy mba nisahana ny firenena manontolo

Iraika amby dimampolo taona niaina fahafahana fa tena lasa bobongolo

Vahiny no manjaka, sinoa sy ny karana mbamin’ny kaomoriana ary ny vazaha

Nibananaka teo ilay Madagasikara maro mpahalala tsy nisy mpiraharaha

Efa nohadinoina ny hafatr’i Nampoina, fony izy teo nitantana

Tandremo anie lehiretsy, hoy izy, tsy mahazaka izato tanindrazana

Ka mitady tany hadiana tena mba malemy hanorenana fangady

Handao ny firenena, hitsoaka ny adidy, tsy vonona hiatrik’ady

Tsy marina àry ve ny fihevitry ny Ntaolo izay nahatsinjo lavitra

Andrianampioinimerina efa nahalala mihitsy ary niady varotra

Fa raha ilaozana ny tany, hitadiavana ny tombotsoan’ny tena

Tsy maintsy hisaritaka sy ho lasan’olon-kafa hatramin’ny firenena.

Misy zaratany efa mba napetrany ary nodidiany ho maintisina molaly

Saingy izay nomeny nesorina ankeriny tamin’ny fanjanahantany

Ireo taranaka nadimby izay mba nahalala ny hasin’ny tany niaviana

Niolomay mihitsy niverina nividy ireo zarataniny, nony taty aoriana

Fa nisy koa anefa no tonga dia nilefa nandao ny tanindrazany

Tsy noho ny fianarana na ny fanendrena tsy azo nanoharana

Fa tena fitadiavana tany izay malemy hiorenan’ny fangadiny

Tsy anjarany hono manko no misahana irery izato tanindrazana

Raha tonga ny fotoana mba hankalazana fahaleovantena

Dia sadasada ihany ny fety sy lanonana haroso sy ekena

Voalohany amin’izany ilay lazaina fa tena hoe lafatra

Tsy azonao an-tsaina  fa OPERA no natao niampatra

Ka fetim-pirenen’iza àry ity ankalazaina fa mahavaka saina

Be ny olona no mandà ny hitotorebika sy hananga-tsaina

Samy mahatsapa fa very tsy hita intsony ny fiandrianam-pirenena

Samy mahalala fa very ny taranaka saingy dia tena mahonena

Fa tsy misy sahy mijoro ho lehilahy hitaky fahamarinana

Fa dia aleo ihany mitady izay hameno ny any an-tsikinana…