Anisan’ny biby nanoharan’ny Ntaolo ny toetra ratsin-draolombelona ny Foza sy ny Alika ka tokony tsy ho tahafina mihitsy.  

MPIHENAHENA  

Ny olombelona tsy marintoetra ohatra dia nokianin’ny fiaraha-monina nisy azy ary ny Foza no noraisiny ohatra tamin’izany ao anatin’ity ohabolana manaraka ity.  

“Aza manao foza kely anaty lavaka , alorina tsy azo, topazan-drano tsy mety mivoaka fa ao anaty lavaka ao ihany no manigainga tanana.” 

MIKAMBAN-DRATSY 

Misy fiarahana mampisalsala sy tsy azo antoka rehefa tsy mitondra vokatsoa ho an’ ny fiaraha-monina. Matetika tokoa manko, eny anivon’ny fiaraha-monina eny misy antokon’olona na andian’olona mifanaraka mandrakariva, miray hevitra ary mifampitaona mihitsy hanorin-javatra. Tsikaritry ny Ntaolo fa misy amin’izy ireny no mitovy amin’ny amboa ka noràrany ny manam-panahy tsy hanao to azy ireny :  

“Aza maro tsy mahavita n’inon’inona toy ny karazan’amboa, zatolahy tsy midina ankosy, arivovavy tsy mitam-bodiketsa.” 

Voamarika fa tsy ny fahamaroan’ireo miaradia no inona fa ny fahaiza-manao sy ny traikefa ananana. Ao anatin’ny fiaraha-monina araka izabny, na misy olona milaza azy hanao zavatra aza, ary na marobe toy inona aza, dia mitovy amin’ireto andiam-biby ireto ihany fa tsy ahefa inona tsy akory. Ny mihosy sy manetsa ohatra, ankoatra ny olombelona, dia ny omby ihany no ampiasaina aminy fa mbola tsy nisy alika nampiandraiketina izany raharaha izany. Ahitana fanehoana fahasamponana koa ity ohabolana ity. Azo oharina amin’ny ”sampona” ny olona mikambakambam-poana tsy mahavita n’inon’inona.

 TSY MAHATAM-BAVA  

Ny alika no voatondro fa manao ireo toetra ireo. Hoy indrindra ny ohabolana hoe:  

“Mitondra teny mivoaka toy ny amboa voakapoka”.  

Sarisary hita amin’ny fiainana andavan’andro io. Ny alika tokoa rehefa kapohina no sady roahin’ny olombelona mivoaka ny trano dia mitabataba tsy ifandrenesana. Ny olona mpamoaka ny tsiambaratelo aboraka aminy no tondroin’ny olona amin’io ohabolana io matetika.