Rotika ny foko ry nosy tena mamiko

Mijery ny hamotehana ito faritaniko

Vola sy harena no entina hanambazana

ny tsy ampy fiheverana, hanary tanindrazana!

 Fantara izao fa ny mpanjanaka taloha

No mizahozaho sy mampiasa atidoha

Hambabo sy hangeja ny fahaleovantena

Kanefa dia miroboka sy manolo tena

 Ireo mpiray fiaviana amiko eto an-toerana

Tsy misy manakiana, ny manaiky moa tsy ferana

Miray tsikombakomba manohana izay tsy izy

Tsy mihevitra akory ny ho avin’ny ankizy

 Hitondra ho aiza anefa izato fanarahana

Antokon’herisetra izay mibahambahana?

Tondro molotra ange no fankatoavana

azon’izy ireo avy amin’ ny lafin-kavana

 na ny avy any dilambato na ny eto an-toerana

Tsy misy mankato, tsy misy mety hiserana

Aty an-tanindrazana fa manidy fo

Amin’ireto olona sokajiana ho lo!

 Mifona mihitsy aho ry tany izay tsy foiko

Tsy afaka mitraotra, lany andro mitoloko

Ny firaisankina no hitako tsy ampy

Ka mampisalasala ireo izay te hanampy

 Tsy sasatra ny maro mitady fanafody

Kanefa hatrami(n’i)zao tsy mbola mety tody

Vahaolana matotra hamongorana tanteraka

Ny asan’ireo ratsy izay mampivalaketraka

 Adray ry tanindrazako tena very mihitsy

Ny soatoavina noho ireo olom-bitsy

Minia tsy mijery ny hasarobidin’ny

Fiandrianam-pirenena, tena farahidiny!

 RAMASINIRINA