Rehefa nisy ny fifandonana teo amin'ny FRS sy ny mpianatra nampian'ny ZWAM, dia nirotsaka nidina an-dalambe niaraka tamin' ny mpianatra, ny mpiasa sy ny ray aman-dreny. Tonga hatramin'ny fitakiana ny fialan'ny mpitondra ny resaka. Tsy nitsahatra ny fihetsiketsehana, raha tsy ny Alakamisy 18 Mey 1972, nanomezan'ny Filoha Tsiranana Philibert fahefana ny Jeneraly Ramanantsoa Gabriel, hanangana ny fitondram-panjakana handamina ny tany sy ny fanjakana.

NY FOMBA NANDRAFETANA ILAY FITONDRAM-PANJAKANA

Niavaka tamin'ny teo alohany ilay fitondram-panjakana, satria 10 monja no isan'ny ministra, ka 4 ireo manamboninahitra, ny 6 kosa dia teknisiana avokoa. Miaramila avokoa no notendrena ho lehiben'ny faritany 6. Tsy mpikambana tao anatin'ny antoko politika ireo ministra notendrena. Voasolotena tao amin''io fitondram-panjakana io avokoa ny faritany enina.

NY NAMPIAVAKA ILAY FITONDRAM-PANJAKANA

Raha vao nandray ny fahefana natolotra azy ny Jeneraly Ramanantsoa, ny voalohan-teniny dia ny hoe: “Miaramila aho fa tsy mpanao politika, ka ampatoriana aloha ny politika”.

Raha vao tafatsangana ilay fitondram-panjakana, ny fanapahan-kevitra noraisina voalohany indrindra, dia ny famotsorana ireo gadra politika, anisan'izany: Monja Jaona, André Resampa, Rakotonirina Regis sns, nambara ihany koa izy fa tsy miankina amin'ny antoko politika ny fitondram-panjakana, ary nalalaka ny fanehoan-kevitra na teo amin'ny Radiom-pirenena na teo amin'ny Televizionam-pirenena.

Nofoanana ny hetra isan-dahy sy ny hetran'omby, novelomina indray ny rafitra fokonolona, fomba fitantanana tamin'ny andron'ny Mpanjaka Andrianampoinimerina. Teo amin'ny fifandraisantsika amin'ny any ivelany dia nohavaozina ny fifanaraham-piarahamiasa Malagasy sy Frantsay. Nalefa nody ireo miaramila frantsay. Niverina tamintsika malagasy ny Lapan'Ambohitsorohitra, ny Trano maromaro teo Ambohidahy, ny Toby miaramila, teny Betongolo, Ivato , Fiadanana ary ny tany Antsiranana.

NY FITONDRAM-PANJAKANA: LOHARANO NIPOIRAN'IREO MPANAO POLITIKA

Ny ankabeazan'ireo ministra tao amin'ny fitondram-panjakana notarihan'ny Jeneraly Ramanantsoa dia mbola nanohy hatrany teo amin'ny raharaha politika taty aoriana, afa tsy mpikambana telo dia Andrianada Jacques Ministry ny fitsarana, Manambelona Justin Ministry ny fampianarana sy Ramaroson Albert Marie Ministry ny toekarena sy ny vola.

Ny efatra tamin'ireo ministra dia nitana ny toeran'ny Filoham-pirenena taty aoriana: Ny Jeneraly Andriamahazo Gilles Ministry ny fanajariana ny tany, Ny Kolonely Ratsimandrava Richard Ministry ny atitany. Ny Capitaine de frégate Ratsiraka Didier Ministry ny raharahambahiny, ny Pr Zafy Albert Ministry ny fahasalam-bahoaka. Ny roa tamin'ireo ministra dia nitazona ny toeran'ny Praiministra koa taty aoriana, ny Kolonely Rakotomalala Joel Ministry ny filazambaovao sy ny Dr Rakotovahiny Emmanuel Ministry ny fampandrosoan ny eny ambanivohitra.

Ankehitriny ny telo mirahalahy sisa velona dia ny Amiraly Ratsiraka Didier, ny Dr Rakotovahiny Emmanuel ary ny Pasitera Rajakoba Daniel izay Ministry ny asa sy ny asam-panjakana.

Ny fitondrampanjakana notarihan'ny Jeneraly Ramanantsoa no fitondrana tetezamita voalohany. Na dia miaramila manamboninahitra aza ny mpitarika sy ireo ministra sasany tao, dia tsy mba nampiasa hery tamin'ny vahoaka, sady nalalaka tanteraka teo amin'ny fanehoan-kevitra. Nanome lanja ny fokonolona ary tsy mirobaroba tamin'ny volam-bahoaka fa nampihatra ny politikan'ny fitsitsiana.